Уроки по Joomla 3 можно найти здесь: http://joomla3x.ru/
Понедельник, 30 августа 2021 09:43

Саҥа үөрэх дьылын көрсө

Автор

Саҥа үөрэх дьыла саҕаланара а5ыйах хонук хаалла.  

Атырдьах ыйын 20-28 күннэригэр «Көлүөнэлэри иитии: гражданскай уопсастыба уонна идэлээх холбоһуктар үнүстүүттэрин сомоҕолооһун» СӨ үөрэҕин уонна наукатын үлэһиттэрин атырдьах ыйынааҕы сүбэ мунньахтара буолла. Мунньах чэрчитинэн үөрэх миниистирэ Михаил Сивцев үөрэнээччилэри уонна педагогическай үлэ ветераннарын кытта онлайн көрсүһүүтэ тэрилиннэ, эдэр педагогтар форумнара ыытылынна. «Дьиэ кэргэн уонна уопсай үөрэхтээһин, идэ биэрэр үөрэх тэрилтэлэрин бииргэ үлэлэһиилэригэр инновационнай сыһыан: кыһалҕалар, көрдөөһүннэр уонна быһаарыылар» аһаҕас төрөппүт мунньаҕар оскуолалартан салайааччылар уонна төрөппүт кэмитиэттэрэ кыттыыны ыллылар. Салайааччыларга, педагогтарга, үөрэнээччилэргэ, оҕо тэрилтэлэригэр, агрооскуолаларга анал сирэй уонна онлайн мунньахтар, семинардар, дискуссионнай площадкалар, куурустар ыытылыннылар.

Үөрэтии алын уонна сүрүн сүһүөҕэр федеральнай государственнай үөрэх стандартара уларыйан, үөрэтиллэн, 2022 сыл балаҕан ыйыттан үлэҕэ киириэхтэрэ. БКЭ сорудахтарын тутулугар уларыйыылар киирдилэр. Иитии үлэтин тупсаран, көдьүүстээхтик тэрийии республика үөрэхтээһинин сүрүн соруга. Дойдуга бэриниилээх, инникитин дьиэ кэргэн тэринэр уонна идэ ылан үлэһит буолар, ылыммыт быһаарыныыларыгар эппиэтинэстээх буоларга оҕону иитэн таһаарыахтаахпыт. Бу үөрэх дьылыгар оҕо-ыччат сайдар эйгэтин тэрийиигэ «Эркээйи эргиирэ» программа үлэтин саҕалыаҕа.

Оҕо доруобуйатын харыстааһын уонна бөҕөргөтүү суолталаах сорук буолан, хаачыстыбалаах уонна куттала суох сынньалаҥы, чэбдигириини, физкультуранан көхтөөхтүк дьарыктаныы туһатын иҥэриини, доруобуйаларыгар хааччахтаах оҕолор спордунан хааччаҕа суох дьарыктаналларын, чэбдик аһылыгы тэрийии инники күөҥҥэ тахсар.

Быйыл улуус оскуолаларыгар барыта 4 тыһ. тахса оҕо үөрэниэҕэ, 425 оҕо маҥнайгы кылааска киириэҕэ.

2021 сылга «Үөрэхтээһин» национальнай бырайыак «Аныгы оскуола» федеральнай бырайыагын чэрчитининэн естественно-научнай уонна технологическай хайысхалаах «Точка роста» кииннэрэ Алаҕар, Соловьев, Хадаар оскуолаларыгар аһыллаллар. Манна химия, биология, физика биридимиэттэрин уонна робототехниканы дириҥэтэн үөрэтии, науканан дьарыктаныы тэриллиэҕэ. Онтон “Цифровой үөрэх эйгэтэ” федеральнай бырайыагынан Төлөй, Кытаанах, Одьулуун, С.А. Новгородов аатынан Чурапчы оскуолаларыгар Чурапчытааҕы гимназияҕа цифровой кабинеттар аһыллыахтара. Үөрэнээччилэр, учууталлар түргэн интернеты туһанан цифровой үөрэтэр платформаларга киирэн дойду биллииллээх педагогтарыгар, учуонайдарыгар үөрэнэр кыахтаныахтара. Оскуола отчуота, педагогтар аттестациялара, квалификацияларын үрдэтиилэрэ барыта биир ситимнэниэҕэ.

Саҥа үөрэх дьылыгар барыгытыгар үрдүк ситиһиилэри, чэгиэн-чэбдик туругу, тулхадыйбат тулууру, уҕараабат эрчими, дьоллоох уйгу-быйаҥ олоҕу баҕарабыт.

Прочитано 66 раз