Уроки по Joomla 3 можно найти здесь: http://joomla3x.ru/
Пятница, 05 февраля 2021 17:31

Сүрэхпин оҕоҕо аныыбын -2021

Автор

 

Учуутал эн-
Маҥнайгы чугдаарар чуорааҥҥын
Мындыр өй суолугар сирдиигин,
Саҕахтан сапсынар сарыаллыын
Сандаарар сырдыкка илдьэҕин!
        Маннык үтүө тыллары анаан туран “Сүрэхпин оҕоҕо аныыбын” кылаас салайааччыларын күрэҕэ тохсунньу ый 29 күнүттэн саҕаламмыта.
Сылын аайы бу күрэх кылаас салайааччытын идэтин таһымын үрдэтэр, баай уопутун дьоҥҥо-сэргэҕэ билиһиннэрэр, билиитин-көрүүтүн атастаһар сыаллаах ыытыллар. Сылтан-сыл сонунтан-сонун уроктары, бырайыактары көрөбүт, сыаналыыбыт, саҥа үйэ ирдэбилинэн, саҥаттан саҥа кэрдиискэ кылаас салайааччыта үүнэн, сайдан иһэрин бэлиэтиибит.
        Күрэх историятын саҕахтарын арыйдахха –бастакы күрэх 1994 сыллаахха ыытыллыбыта. Бү күрэххэ РФ үөрэҕин туйгуна, Саха Республикатын үөрэҕириитин бочуоттаах ветерана, Хайахсыт орто оскуолатын бэтэрээн, математика учуутала Мария Николаевна Петрова кыайбыта. Күрэх историятыгар биир чаҕылхай кыттааччы- Нюргуяна Владимировна Макарова, Бүтүн Россиятааҕы оскуола оҕолорун хамсааһынын региональный координатора, Республикатааҕы оҕо хамсааһынын киинин директора. 2009 сыллаахха улуус түһүмэҕэр кыайыылаах тахсан, Республикатааҕы түһүмэххэ Чурапчы улууһун аатын ситиһиилээхтик көмүскээн, “Методист Республики Саха (Якутия)” знак хаһаайкатынан буолбута.
        Дьүүллүүр сүбэ бэрэссэдээтэлэ - Осипова А.Н., Үөрэх управлениетын начальнигын солбуйааччы. Чилиэннэр: Винокурова И.Г.,Үөрэх управлениетын иитии уонна эбии үөрэхтээһин отделын начальнига, Кардашевская С.Т., Үөрэх управлениетын уопсай үөрэхтээһин уонна методическай арыаллааһын отделын начальнига., Филиппова Т.Ю., Үөрэх управлениетын педагогическай уонна психологическай арыаллааһын отделын специалиһа, Павлова С.А., В.С.Соловьев-Б.Боотур аатынан Хатылы орто оскуолатын алын кылааһын учуутала, былырыын ыытыллыбыт “Сүрэхпин оҕоҕо аныыбын” күрэх улуустааҕы түһүмэҕин кыайыылааҕа, республикатааҕы түһүмэх “За верность к профессии”анал аат хаһаайката, , Окоемов Максим, Д.Г. Барашков аатынан Бахсы орто оскуолатын 11 кылааһын үөрэнээччитэ.
        Быйылгы күрэххэ 11 оскуолаттан кылаас салайааччы кытынна. Дьүүллүүр сүбэ барыта 4 түһүмэҕинэн (видео эссе (бэйэни билиһиннэрии), бырайыак көмүскээһинэ, кылаас чааһа,кейс-сессия) көрдүлэр-иһиттилэр, сыаналаатылар. Кыттааччылар туох баар билиилэрин, уопуттарын, сатабылларын ууран туран кытыннылар. Араас умсугутар, оҕону-ыччаты үтүөҕэ-кэрэҕэ, сиэрдээх буолууга иитэр кылаас чаастарын көрдүбүт. Кыттааччыларбыт талбыт идэлэригэр сүрэхтиин-быардыын, өйдүүн-санаалыын ылсан, бэриниилээхтик үлэлии-хамсыы сылдьалларын сөхтүбүт.
        Түмүккэ, кыайыылааҕынан таҕыстылар:
Муҥутуур кыайыылаах- Романова Люсция Иннокентьевна, Степан Кузьмич Макаров аатынан Чурапчы гимназията.
1 истиэпэннээх лауреат - Седалищева Саргылаана Андреевна, Семен Андреевич Новгородов аатынан Чурапчы орто оскуолата.
2 истиэпэннээх лауреат - Собакина Дария Петровна, Петр Митрофанович Васильев аатынан Соловьев орто оскуолата.
3 истиэпэннээх лауреат-КузьминаАнна Гаврильена, Афанасий Петрович Илларионов аатынан Хайахсыт орто оскуолата.
Анал ааттар:
«Признание детей»- Ким Нюргуяна Дмитриевна, Семен Андреевич Новгородов аатынан Чурапчы орто оскуолата.
«Педагогическая перспектива» - Григорьева Светлана Семеновна, Семен Дмитриевич Флегонтов аатынан Хадаар орто оскуолата.
«Инновации в образовании»- Захарова Анастасия Ивановна, Иван Егорович Федосеев-Доосо аатынан Дирин «АГРО»
орто оскуолата.
«Мастерство и опыт» - Николаева Анна Константиновна, Семен Степанович Яковлев-Эрилик Эристиин аатынан Чакыр орто оскуолата.
Махтал суруктар:
Борисова Александра Григорьевна, Василий Семенович Яковлев –Далан аатынан Кытаанах орто оскуолата.
Кириллова Кюндюйээнэ Петровна, Афанасий Акимович Макаров аатынан Улахан-Күөл орто оскуолата.
Седалищева Мария Николаевна, Николай Дмитриевич Субурусскай аатынан Болтоҥо орто оскуолата.

      Кылаас салайааччыта хас биирдии киһи олоҕор ийэ, аҕа тэҥэ үрдүк суолталаах, күндү, чугас киһибит. Кини сүбэтэ-амата, такайар-иитэр үлэтэ, кыһамньыта, истиҥ сыһыана –үөрэнээччилэрин үрдүккэ кынаттыыр, олоҕу сыаналыырга, тулалыыр эйгэни таптыырга үөрэтэр, сиэрдээх киһи буола улаатан олоххо бэйэ миэстэтин буларга сирдиир.
Бары кыттыбыт кылаас салайааччыларыгар, оскуола директордарыгар, иитэр үлэҕэ директоры солбуйааччыларга, учууталларга Үөрэх управлениетын аатыттан барҕа махталбытын тиэрдэбит! Сыралаах үлэҕит сыаналаннын, түбүктээх үлэҕит түмүгэ сүргэҕитин көтөхтүн!!!

 

 

Прочитано 353 раз Последнее изменение Пятница, 05 февраля 2021 17:40